Poetry in motionSwiphato swa Xitsonga

A yi na xihlawula-mbala


Hi lavaya majaha ntiyela ni vavanuna xidzi!

Namuntlha va werile,
Kunene yi va mitile ndzhundzhu ya xintu,
Loko u nga dyangi vuswa a wu wanuna wa cilo,
Yi lava swi fa ntshiriti.

Siku ro hohloka ku biwa swivuvutani ni minkulungwana
Aredzi we mbhonjwana machava ntsumani,
Va longolokile majaha
Va vuyile va ma dla xirhami va fela ngoma,
Namuntlha mavito lama vuhlangi ya munyiwile,
Phela ta le ngomeni a ti byeriwi vaswirhundzu,
Hambi vambhonjwana a va lumiwi ndleve.

Namuntlha va thyiwe mavito lamantshwa kaa!
VaGezani, Yingwani, Khazamula na Risenga,
Vujaha byo nyenye byi sele kwale!
Se i vavanuna xidzi,
Byetlelo se va byi kuma elawini,
Hambi xikonyololo se xi sungule ku mila,
Va hlovile majaha hi nga vonani,
Va mbyindliwe hi tsumani,
Va hiza ni miceka leya ngati,
Va gagadele ni tintlhaka,
Se va vuyile majaha,
A hi beni nenge ku va rhula xirhami.

Mutsari: Sheila wa Vutlhokovetseri

Flair
the authorFlair

Leave a Reply