Poetry in motion

Swi ba nhloko leyi

SWI BA NHLOKO LEYI

Hi letiya tintombhi to xonga ti rilela vukati
Loko va etlele hi lavo lorha va tekiwe ka mkhulu
Va lava ku lovoriwa leswaku va ta dya mafehlefehle
Va navela ku vutiwa leswaku va ta byi rhikinya
I norho wa mani na mani ku va na ndyangu
Mianakanyo ya tithugamama leti hi vutomi byo hloma hi leyo tiyisa nhlana
A va swi tivi leswaku vukati i xibaha, bya bava!
A va swi tivi leswaku ka chachameriwa le!

Hi mina loyi, ndzi byi tlhavile vukati
Hi mina loyi, ndzi ambale nguvu ya xivongo xa mukhalabye wa mina
Hi mina loyi, ndzi n’wi tswalele na vana
Hi mina loyi, byi ri mina wee!
Kambe loko wu ri ntsako, ndzo hlaya hi wona etibukwini
N’wayitelo wa wansati ndzi wu hlalela eka mavona-kule ntsena
Vukati byi ndzi komba hangayivona!

Loko dyambu ri tlhava, nuna na vana va languta mina va lava swo miyeta nyoka
Loko ri ba thavathava, va honokela ye’ mina leswaku ndzi endla rhengu
Loko ri tlomuta, va ndzi harambuta hi min’wala leswaku ndzi ku khoo!
I ndzhwalo wa wansati walowo
Vukati byi nandziha loko u ri ku byi anakanyeni
Loko se u byi kumile, byi hundzuka ndzhwalo
Vukati i mugodi wa mayini wa nsuku
Lava nga le handle va navela ku nghena
Lava nga le ndzeni va navela ku huma
Aredzi manana!

Mutsari: Malphia Hon’wane

Flair
the authorFlair

Leave a Reply