Arts CornerPoetry in motion

Ti tlhontlha vutomi

 

Sheila Mathevula, loyi a tivekaka hi vito ra Sheila De Poetic Queen, u tirhisa vutlhokovetseri ku tlhontlha vutomi bya vo tala.

Sheila De Poetic Queen i ntombhi leyi velekeriweke no kulela etikweni ra Ka-Bungeni, eLimpopo. U sungule mhaka ya vutsari a ha ri ntsongo swinene naswona eka yena ku tsala a ko va ndlela yo tisusa xivundza ntsena. Hambiswiritano, De Poetic Queen u humesile tsalwa rakwe ro sungula leri thyiweke, ‘Ti Tlhontlha Vutomi’. Tsalwa leri ri landzela mambirhi lama a ma tirheke na van’wana.

Titlhontlha Vutomi i tsalwa leri fuweke hi switlhokovetselo leri humeke hi n’hweti ya Nyenyankulu 2022. “Timhaka leti nga endzeni ka rona ti tlhontlha vutomi. Ndza rila, ndza tshinya, kasi kun’wana i ntsako ntsena,” ku vula Sheila De Poetic Queen. Lexi hlamarisaka no nyanyula hi leswaku Shiela u lo tiendlela tsalwa leri hi yexe, ku suka eka ku ri tsala ku ya eka vukandziyisi.

 

Vito ndzi lo ri lorha, kutani ndzi ri tekela enhlokweni. Norho a wu kombisa munhu loyi ndzi nga n’wi tiveki a ta eka mina a fika a ku, ‘timhaka leti nga la ti tlhontlha vutomi’. A a ri karhi a hlaya tsalwa leri nga na xifaniso xa mina. 

Xin’wana lexi nyanyulaka hi leswaku ku endliwe ndzavisiso wukulu leswaku tsalwa leri ri kala ri humelela. Sheila De Poetic Queen a a lava ku tirhisa ririmi leri hlantswekeke, xisweswo u boheke ku lavisisa marito yo tala. Ku tlula kwalaho, tanihi leswi ku nga khale yena na xitsalo ku ri bandi na buruku, a swi n’wi tikelangi ku fika kwalaho ku va a tsala tsalwa leri. Leswi swi swi veka erivaleni leswaku wanhwana loyi u na nkhinkhi naswona u tirha hi ku tiyimisela eka leswi a swi endlaka.

Nkhinkhi wakwe wu vonaka hi ku va a tiendlele tsalwa leri hi byakwe hi ku tirhisa ntlawa wa Writer’s Corner Institute, ku nga ntlawa lowu nyikaka switsundzuxo mayelana na vutsari, lowu na yena Sheila a nga un’wana wa vasunguri va wona. “Ndzi kume mpfuno eka vabuti wa mina vambirhi ku nga Vilela F Khalanga na Ntsako K Khalanga,” ku hlamusela Sheila.

Ku hambana na ntshava yi nga yima ndhawu yin’we, Shiela u tiyimisele ku ya emahlweni na vutsari naswona u lava ku fikelela swikulu eriendzweni leri. Wa gimeta: “Ndzi lava ku tikuma ndzi tsale matsalwa yo ringana 30 ya Xitsonga.”

 

Sheila Mathevula u kumeka eka: WhatsApp: 076 193 6673 Facebook: Sheila Wa Vutlhokovetseri

Mutsari  wa hungu leri i Brenley Ngoveni

 

 

Flair
the authorFlair

Leave a Reply