Arts Corner

Vunanga byo rhula no aka

Mutsari: Brenley Sengen Ngoveni

“Ku nonoka ka rimpfani a swi vuli ku ri nge fiki laha ri yaka kona.”
Marito lama ma vuriwe hi xiyimbeleri xa vunanga bya Xingondo kumbe African Rumba, Chavelela Elnathan Ngobeni.

Chavelela Elnathan Ngobeni i nqambhi leyi tivekaka tanihi Chazo ku suka eGiyani naswona hi laha a nga kulela kona ku fikela namuntlha. U tiveka tanihi hi muchayi wa katara, muyimbeleri xikan’we na musunguri wa ntlawa wa The Sango Brothers.

Chazo u chaya vunanga lebyi tivekaka tanihi Xingondo kumbe African Rumba, lebyi hi hala tlhelo byi vitiwaka Sungura etikweni ra Zimbabwe. Gondzo rakwe ra ku chaya katara ri sungule eka khume ra malembe lama nga hundza loko a ri na kaye (9) wa malembe ntsena. Hambiswiritano, u sungule ku yimbelela hi 2018 loko a ta humesa risimu ra yena leri nga va na ndhuma swinene ra Xirhulurhulu.

Ndzi tsakerile ku hlawuleka exikarhi ka vantshwa hikuva ndzi hlawula ku yisa emahlweni vunanga lebyi nga rhula naswona byi akaka, byi layaka byi tlhela byi dyondzisa swilo swo tala hi vutomi na swinwana.

Hambileswi a nga se humesaka album ku fikela sweswi, Chazo u teke xiboho xa leswaku tinsimu ta yena ti huma hi ti single tracks ku kondza ti fikelela nhlayo ya album yo sungula leyi vuriwaka “Nhlupheko” leyi vumbiwaka hi 8 wa tinsimu. Tin’wana ta tinsimu ta yena leti a ti qhambheke ti katsa Xirhulurhulu, Corona na Vutomi, ku nga risimu leri khutazaka rixaka leswaku hambi vutomi byi famba ximatsi, ku hanya swi tsakisa ku tlula rifu.
“Tinsimu ta mina ti endliwe hi ndlela ya ku ta swi kota ku tsundzuxa rixaka eka swilo swa nkoka evuton’wini. Ti hundzisa rungula leri nga pfunaka eka vutomi bya namuntlha no va ti kota ku khongotela timbilu leti tshovekeke. Hi hala tlhelo ta dyondzisa swinene hi matimu ya tindhawu to karhi,” Chazo wa hlamusela.


Hilaha swi nga hakona eka swiyimbeleri swo tala, Chazo na yena u langutana na swiphiqo loko swi ta eka vuyimbeleri. Swin’wana swa swiphiqo sweswo swi katsa swa timali. Hambiswiritano, xiyimbeleri lexi a xi veki matomu ehansi.

Rirhandzu leri ndzi nga na rona eka xingondo swin’we na nseketelo lowu humaka eka vaseketeri va mina hi swona swi ndzi susumetaka swinene leswaku ndzi nga tshiki ku yimbelela.

Chazo a nga tirhi a ri yexe eka vuyimbeleri byakwe, kambe u tirha na Wiseman Ngobe eka Rhythm Guitar, Kulani Mabasa eka Bass Guitar,  Mpho eka tidrums na Nkulukumba N.S  Ngobeni tanihi miningere tlhelo muhumelerisi wa Chazo & Sango Brothers.
“Ku sukela ndzi sungule vuyimbeleri ndzi kuma swikhutazo na swibumabumelo swo tala ku suka eka vanhu. Va kombisa leswaku vuyimbeleri bya mina bya nandziha swinene naswona va lava leswaku ku huma ni tin’wana tinsimu hikuva ta va khutaza swinene,” ku hlamusela Chazo.

Tinsimu ta Chazo ta kumeka  eka Internet hi ku tsala ku Chazo & Sango Brothers kutani u tsala risimu leri u ri lavaka. Kasi loko ku ri risimu ra Vutomi leri ra ha ku humaka ri kumeka eka Chazo hi byakwe eka nomboro ya 0719200910 hikuva a ri se kumeka eka internet.
“Handle ko kanakana ndzi tiyimisele ku yisa vunanga emahlweni. Swi ngo teka nkarhi kambe ku nonoka ka rimpfani a swi vuli leswaku a ri fiki laha ri yaka kona,” ku gimeta Chazo.

 

Flair
the authorFlair

Leave a Reply