Flair Time OutMatsalwa ya Xitsonga

BYA JIKA VUTOMI LEBYI

 

Amos Baloyi i jaha ra malembe ya 21 ro huma emugangeni wa ka Jim Nghalalume ehandlenyana ka doroba ra Giyani eLimpopo. Yena u sungurile ku tsala tibuku hi lembe ra 2018 laha a endla giredi ya nkaye exikolweni xa le henhla xa Jim Rhangani.

Ndzi tsarile tibuku to ringana timbirhi kambe a ti kotanga ku huma, hikwalaho ka ku va ndzi nga kumi vanhu va ku humelerisa tibuku ta mina. Kambe leswi a swi endlanga leswaku ndzi vonela norho wa mina ebodleleni. Hi  lembe ra 2020 hi November, ndzi sungurile ku tsala book leyi ndzi nga yi nyika vito ra BYA JIKA VUTOMI LEBYI. Leyi i buku yo sungula ku va yi humelela, laha yi nga humelerisiwa hi va Chaval Publishing hiti 03/09/2021.

 

 

Novel leyi ya Xitsonga i buku leyi vulavulaka hi munhu loyi a hlanganaka na minthlonthlo hala ni hala evutonwini bya yena, kambe hi ku tiyimisela na ku tiyisela a kota ku fikelela milorho ya yena. Ximunhu hatwa lexi xi tswaleriwa emutini lowu nga na vusweti swinene, leswi swi vekaka vumudzuku bya yena eka xiyimo xo tika tani hi leswi va hanyaka hi rikoko ra xilondzo. Hambi swiritano u na torha ra ku humelela, hambi leswi mhisi yi nga tlakula tshuri ekaya. Dyondzo hi yona tikithi ra yena ra leswaku siku rin’wana  xiyimo xa yena xita ncinca. Kambe rendzo leri a ri fambaka ri tele mitwa. Xiyimo xa yena xi nyanya ku tika dyambu ri nga se n’wi xela.

Vito ra buku leyi rivula leswaku loko hi karhi hi hanya laha misaveni a hi tivi leswaku lexi nga heriki xa hlola. Hi nga va hi ri emahlomulweni eka nkarhi wa sweswi kambe siku rin’wana vutomi bya hina byita ncinca, a swi nge tshami hilaha ku nga heriki, hikuva Bya Jika Vutomi Lebyi.

Baloyi u vula leswaku loko a karhi a tsala buku leyi a anakanya hi yena n’winyi, a vona hi laha byi nga n’wi jikerisa xiswona.

Loko ndzi nga se sungula ku tsala buku leyi, ndzi endlile ndzavisiso hilaha vanhu eka minkarhi va hanyaka hi wona, ndzi kumile leswaku vanhu hina mavondzo ni nsele eka vanhu van’wani lava hi hanyaka na vona, ndzi ringetile ku teka vutomi bya masiku lawa, ndzi tsala hi byona leswaku  ndzi ta dyondzisa vanhu leswaku ku khola ka nuha rinwani ra masiku byi ta hi jikela vutomi lebyi.

Baloyi u vula leswaku ntlhontlho lowu a nga hlangana na wona leswaku a tsala buku leyi ku kondza a ya fika emakumu ka yona, hi leswaku yena i munhu wo rhandza ku hlaya tibuku leti tsariweke hi Nkulukumba Isaac Saki Shabangu, kutani u vile na ntlhontlho wa leswaku na yena siku rinwana u lava ku tsala tibuku leti nga ta dyondzisa vanhu ku fana na tibuku ta Nkulukumba Saki Shabangu.

“Buku ku yi tsala swi ndzi tikerile swinene hikuva a ndzi fanele ku va ndzi langutana na timhaka ta xikolo, leswi a swi endla leswaku ndzi nga kumi nkarhi wo tala wo tsala buk. Kambe ku olova ka swona hileswaku loko ndzo ze ndzi sungula ku yi tsala a ndzi ta teka nkarhi wo leha ndza ha tsala eka siku lero’,’ Baloyi wa hlamusela.

Baloyi u ya emahlwei a vula leswaku nkarhi wo pfa a tshika ku tsala buku ku fika emakumu wu vile kona. U vula leswaku xivangelo a ku ri leswaku a nga tivi munhu loyi a ta kota ku yi humelerisa leswi a swi veka norho wa yena eka nxungeto lowukulu swinene.

“Andzi a nakanya leswaku na leyi buku yi nga fana na letiya tin’wana ndzi nga ti tsala, ti nga kotangiki ku humelela.”

Lava va nga n’wi pfuna ku humelerisa buku leyi i Nkulukumba Chavalala Ntwanano lava nga mulawurinkulu (CEO) wa Chaval Investment Holdings tlhelo murhangeri wa Chaval Publishing.

”Ndzi kumile mpfuno wa swa timali, lowu ndzi wu nkhesaka swinene ku suka eka va ndyangu wa mina. Buku yi humile hi ti 03 September 2021′,’ ku vula Baloyi.

Loko munhu a lava buku leyi a ti hlanganisi na yena mutsari Amos Baloyi  eka nomboro ya 0639369391, eka pheji ra facebook Nwana Maseve, kumbe a nga ha ti hlanganisa na Nkulukumba Chavalala eka nomboro ya 0795977247 kumbe a rhumela email eka amosbaloyi50@gmail.com

Baloyi u vula leswaku ku fikela sweswi buku yi le ku xaviweni kahle na swona vanhu va yi rhandza swinene.

Ku hangalasa book swa tika na ku xavisa swi tika hi ndlela ya leswaku van’wana vanhu a va swi rhandzi ku hlaya tibuku, leswi nga leswi loko u navetisa kumbe ku hangalasa buku ya wena vanhu a va xavi.

Makungu ya mina yo tsala ku ya emahlweni hi leswaku, ndzi ta tsala tibuku ta muxaka wo hambana hambana, na hi tindzimi to hambana-hambana leswaku ndzi kurisa timhaka ta vutsari laha South Africa.

©2021 Flair Concepts & Media. All rights reserved. 

Flair
the authorFlair

Leave a Reply