Arts CornerFlair Time OutLifestyle

Mbhurisano na Lekker Stylist

Ntsako Nukeri u endla mafenya hi ku encenyeta vanhu van'wana

Mutsari eka Flair Magazine Enock Shishenge u burisanile na n’wamafenya loyi a endlaka tivhidiyo hi ku tirhisa tiktok, ku nga Ntsako Nukeri loyi a hanyaka hi ku xavisa ti-yoghurt. 

Flair: Ndzi kombela u ndzi byela leswaku hi wena mani naswona u tirha yini handle ka ntirho wo endla mafenya naswona u huma kwihi ekaya?

Lekker: Ndzi Lekkerlaag Ntsako Nukeri wa malembe ya makume mbirhi ntsevu (26). Ndzi huma eka Nkomo 22A eGiyani . Ndzi tihanyisa hi ku xavisa tiyogati.

Flair: Xana hikokwalaho ka yini u ku hi wena Lekker Stylist naswona muxaka wa wena wa mafenya wu vuriwa yini?
Lekker: Ndzi ti vitana Lekker Stylist hikuva ndzi navela ku fana na Shaun Stylist loyi ku nga stylist lexi tivekaka swinene laha Afrika Dzonga. Lol! swa mafenya i ticktock leyi ni yi tirhisaka.

Flair: Xana hi tihi tidyondzo leti u nga ti endle exikolweni xa le henhla mayelana na ntirho wa wena?
Lekker: Ndzi endlile Tousrism Management eWestern College. Ndzi pasile N5.

Flair: Xana u swi kotisa ku yini ku tirha  ntirho wa wena wa ximfumo u tlhlela u endla leswa mafenya?
Lekker: A ndzi na tirho wa xifumo kambe siku tiyogati ti nga ta ni vuyerisa mali yo tala hikona ndzi nga ta wu vitana tirho wa xifumo.

Flair: Xana u sungurile rini ntirho wa wena wa swa mafenya naswona i yini lexi nga ku hlohlotela leswaku u kondza u teka gondzo leri?

Lekker: Swa ku endla tivhidiyo i swa khale. Khale a ndzi tiva tivhidiyo ta tindzimi tin’wana ku kondza ndzi vona ya Xitsonga yi endliwa hi Talent Tiba a encenyeta boti Majuli. Ndzi sungurile ku endla ta mina tivhidhiyo hi nkarhi wa Lockdown. Loko ndzi tiposile eka WhatsApp ku na vanhu lava va nga ndzi hlohlotela leswaku ndzi ti hangalasa hikuva ta tsakisa. Ku sukela nkarhi walowo a ndza ha yimanga.

Flair: Xana a ku lo humelela yini loko boti Majuli yi ku, “Lekker u sungula ku ni tolovela u ni egita egita?”
Lekker: Ku ve na vhidiyo leyi a yi ri kona a va editile boti Majuli yi ambale xikete. Loko swi ya fika ka yona va yi byele ku ku edite mina.

Flair: Xana hi wihi ntirho wa wena lowu u nga wu endla u twa wu ri wa xiyimo xa le maninginingini ku tlula leyin’wana?
Lekker: Vhidiyo ya nongonoko wa ka MLFM wa Gongomela hi yona yi nga hangalaka ngopfu yi va emilon’weni ya vanhu.

Flair: Xana hi swihi swirhalanganya leswi u pfaka u hlangana na swona eka ntirho wa wena wo endla mafenya?

Lekker: Na sapateriwa eka minkarhi leyo tala loko ndzi ambala ti wig na minceka naswona a na ha kumi ku rhula loko ndzi ri laha ku talake vanhu hikuva va ndzi hahela-hahela.

Flair: Xana vanhu va ku amukela njhani loko u hlangana na vona tani hi munhu loyi tivekaka swinene naswona a tivekaka ngopfu hi mhaka yo endla mafenya?
Lekker: Vatsonga hi vona va ndzi amukelaka ngopfu hikuva hi vona ndzi nga duma ngopfu eka vona. Va ndzi amukela tani hi munhu luya wa ka tivhidiyo. Va tsaka swinene va ndzi tlakula va lava leswaku ndzi ncina ndzi endla na leswiya ndzi swi endlaka eka tivhidiyo. Hambi ndzi ri ku dyeni va ndzi hahela va rivala ku leswi ndzi swi endlaka i ku encenyeta vanhu van’wana.

Flair: Xana i yini lexi u lavaka ku xi endla lexi sweswi xi nga ri ku ku endlekeni eka vutshila bya wena?
Lekker: Ndzi navela ku tikuma ndzi ri eka mintlangu ya Xitsonga kumbe yin’wana mintlangu ya kwala eAfrika Dzonga ndzi humesa vuswikoti bya mina. Ndzi navela leswaku ndzi tikuma ndzi navetisa fexeni ya vanhu vo duma. Ndzi na vandla ra mina ra AmaClassiQman, hi ambala swambalo swa ximfumo kutani hi teka swinepe. Hi nga tsaka loko siku rin’wana va nga hi rhamba hi endla swinavetiso swa ka thelevhixini na tivhidiyo ta vunanga.

Flair: I mani wo duma eka swa mafenya loyi u navelaka leswaku u nga fikelela kumbe ku hundza xiyimo xa yena?
Lekker: Ku hava, ndzi languta ngopfu eka swa fexeni ku tlula mafenya.

Flair: Xana i yini lexi xi ku hlohlotelaka leswaku u endla mafenya hi ririmi ra Xitsonga?
Lekker: Hikuva a ku na vanhu vo tala lava va endlaka tivhidiyo hi tiktok erixakeni ra hina Vatsonga. Sweswo hiswona swi nga endla leswaku ndzi hatla ndzi duma.

Flair: I yini lexi u nga xi byelaka valandzeri va wena?
Lekker: Valandzeri va mina landzelerisani milorho ya n’wina hambi va mi hleka va mi vula ku phunta ntsena mi nga etleli na ndlala. Na mina va ndzi vula ku phunta kambe a ndzi cukumeti thawula. Ndzi xikombiso xa kahle swinene hikuva vanhu va twa onge ndzi tshama eSandton hi ndlela leyi ndzi ambalaka hi yona ndzi tlhela ndzi basa. Kasi ndzi titshamela eProtea eka back room ndzi xavisa tiyogati.

©2020 Flair Concepts Magazine. All Rights Reserved. 

Flair
the authorFlair

1 Comment

Leave a Reply