Matsalwa ya XitsongaReviews

Hi tsundzuka nhlonhlorhi ya n’walungu

Hi tsundzuka mutsari werhu wa xitsonga xa rixaladza

792

Mutsari i Enock Shishenge, tlhelo muhlengeleti wa switlhokovetselo swa buku ya “Hi Landza Nhlalala.”

“Nhlalala. Mutlhokovetseri wa tinguva. Mungundzuvanyi wa rixaladza wa timheho, swihlahla na tintshava. Nyenyana ya mintila ya swikokovi na tinyoxi. N’wana wa misava. A swo fanela ku herisa xileswi xana? – Moses Mtileni eka buku ya yena Nhlalala. 

Hi Landza Nhlalala” i buku ya vutlhokovetseri leyi ku nga nhlengeleto wa switlhokovetselo swa Xitsonga leswi tsariweke no lukiwa kahle hi vatsari va khume n’we. Rito ro rhanga ri tsariwile hi Floyd Shivambu.

Lembe leri nga hundza a ku ri lembe ro tshova no hlomula mbilu eka mina. Ndzi lahlekeriwile hi vanghana vambirhi vo tlhariha, va ntokoto na vutivi swinene, Moses Mtileni na Tinyiko Maswanganyi.

Hi Landza Nhlalala i buku yo sungula leyi nga tshama yi tsariwa ku tlangela vutomi bya mutsari loyi a nga hundza emisaveni erixakeni ra Vatsonga. Moses Nzama Khaizen Mtileni loyi buku leyi yi tlangelaka vutomi bya yena, u tswariwile emugangeni wa ka Tomu eka Nkuri eGiyani. U lovile lembe leri nga hundza (2019) a ri na malembe ya makume nharhu ntsevu (36) naswona a tsarile tibuku leti landzelaka: U ya va rungula na When the Moon Goes To Rest (switlhokovetselo); Mpimavayeni na Nhlalala(tinovhele); u vile muhleli na muhlengeleti wa switlhokovetselo swa buku ya Ntsena Loko A Yo Sewula; muhundzuluxi wa switlhokovetselo swa Peter Horn (loyi na yena a nga lova endzhaku ka rifu ra Moses, moya wa yena a wu etleli hi ku rhula na wona) na xirungulwana xa Ngugi wa Thiong’o xa Upright RevolutionOr why Humans Walk Upright (Jacana Translation Issue 01).

Vonana Bila na Moses Mtileni eku simekiweni ka tibuku ta Mtileni, “Mpimavayeni” and “U ya va rungula.”

Swirungulwana na switlhokovetselo swakwe swi kandziyisiwile eka tijenali to kota Illustrations, Asymptote, Timbila, Botsotso, Ons Klyntji na Poetry Potion Quarterly, na le ka tibuku to fana na Tyhini (ISEA, Rhodes University), Sol Plaatje: European Union Poetry Anthology, Voyages, New Pegasus na Endzhutini wa Xidimokirasi (Mount – Knowledge Publishing House).

Handle ka vutsari Moses a ri na ti-Masters’ degree tinharu naswona a endla ti- PHD timbirhi, yin’we na Wits University kasi leyin’wana na University of the Western Cape.

Eka rito ro rhanga Nyiko Floyd Shivambu, loyi a nga xandla xa muprisidente wa vandla ra EFF tlhelo munghana wa Moses ku suka eWits, u tshahile marito lawa Moses a nga ya tsala hi lembe ra 2010 ya leswaku:

Ntlhontlho i mpfilunganyo wa vutomi, vuxongi bya ntumbuluko, ni ku tsokombela ka nkhuluko wa ririmi ra Xitsonga. Swin’we, a hi yimbeleleni kun’we ni tinyenyana ta mpfhuka hi tlangela nyiko ya nkarhi. Xa mina xitluka hi lexi n’wina vo chava ku tsongola xa munhu, ndzi ri a hi ngwingweni swin’we emunyameni wa mitshayito yo pfumala tinhlamuselo.”   

Laha Moses a tivisa buku ya yena yo sungula ya Xitsonga ya “U ya va rungula.” U hi andlalerile vuenti bya matitwelo ya yena hi ririmi ra Xitsonga na vutomi hi ku angarhela. Floyd na yena a nga va a tshahile marito lawa hi ku twisisa xidziki na matimba ya wona.

Nakambe eka buku ya “U ya varungula”xitlhokovetselo xa yena xo sungula lexi nga thyiwa vito ra tsalwa u boxile leswaku “U ya va rungula madyondza ya mina. U ya dzima xintsongana etikweni ro pfumala mintsheketo.”

Leswi swo hi kombisa leswaku a swi tiva kumbe ku swi twa exivirini xa yena leswaku u ta siya vanhu lava va nga ta yisa ndzima leyi a yi sunguleke emahlweni.

Sol Chuma, Ntsako Nhombelani, Enock Shishenge, Sandra Hlungwani, sirha Moses Mtileni, and Ntsako, tin’wana ta timembara ta Nhlalala Book Club lembe leri nga hundza Mtileni a nga se lova eka nhlengeletano yo hetelela ya book club eDube Lifestyle Village.

Switlhokovetselo leswi swi nga endzeni ka tsalwa leri swi vulavula hi swilo swo hambanahambana kambe a swi siyi rifu, coronavirus, rirhandzu na yan’wana mavonavona ya vutomi. Vatsari va lukile switshuriwa swa vona hi ndlela yo tsakisa, yo hlekisa no hlomula mbilu.

Vonani Bila u tsarile eka Mail & Guardian loko Moses Mtileni a lova hi 2019 a boxa leswaku, “Eka malembe lama nga hundza Moses a ri na xivono xa leswaku siku rin’wana u ta tumbuluxa layiburari etikweni ra ka Tomu.”  Leswi swi hi nyika xifaniso xa leswaku Moses a ri munhu wa njhani.

Maruping Phepheng loyi a va tsala no dyondza swin’we na yena u tsarile xitlhokovetselo xa epiki lexi a rilaka no tlangela vutomi bya munghana wa yena. Kambe yena u xi tsarile hi Xinghezi. Na yena a teka Moses tani hi nhlonhlori ya N’walungu. Hi vona eka xitanza xo sungula loko a ku: “the illuminanting fire of the north, the anchor of many.” Yena u tirhisile tinomboro hi ndlela ya vutlharhi ku kombisa leswaku Moses a ri munhu wo rhandza tindzimi ta xintu, ngopfu ngopfu Xitsonga. Na le ka yona buku ya Maruping Phepheng Floyd Shivambu, loyi a ri munghana wa Moses ku sukela loko va hlanganile eWits, u tsarile rito ro rhanga. Buku ya “ashes and fractured moments” na ya “Hi Landza Nhlalala” ti na nkhaviso wa swifunengeti leswi swi nga na xinyenyana hinkwato. Leswi swi hi vuyisaka eka leswaku Moses a ri makomba-ndlela eka dyondzo, vutsari hambi ku ri ntwisiso wa swa tipolitiki.

A hi tlangeleni vutomi bya wun’wana wa vatsari va rixaka ra Vatsonga. A hi tinyungubyiseni hi Xitsonga xa rixaladza. A hi tiphineni hi ku hlaya Xitsonga. Mzala Nhlulo Mtileni u pfula buku hi xitlhokovetselo xa matimba swinene lexi thyiweke “Dyambu ra vuxika”:

 Eka mikwembu ya ka Dzumba.

Na n’wina mikwembu ya Valambya.

Pfuxani tinhloko mi amukela xitukulwana xa n’wina.

Xi taka ximandlamandla.

Mbuva a hi n’wi khomisangi hikuva u lo nyenga.

Hungu a hi n’wi lerisanga hikuva a nga hi lelangi.

 

***

Nzama u kotise dyambu ra vuxika mahatla-ku-pela.

U kotise ndzilo wa mavivi mahatla-ku-timeka.

U kotise nkanyi wa muhwani mahatla ku dzudza.

U kotise swo nadzika mahatla-ku-hela.

Mbali Hlophe, MEC wa swa Mintlangu, Vutshila, Ndhavuko na Vuhungasi eGauteng u swi vekile hi marito ya yena loko hi heta ku veka Moses endlwini ya yena yo hetelela: “Today we laid a great mind to rest. Moses Mtileni, an activist, poet, writer and publisher. A gentle and humble giant whose life was violently shortened. Rest in peace commissar. We now carry the collective responsibility to ensure your ideas live on.”

Eka ndzimana yo hetelela ya rito ro rhanga Floyd Shivambu u hi nyikile ntlhontlho tanihi Vatsonga wa leswaku:

“Hlayani buku leyi mi tiphina hi switshongo swa vutlhokovetseri. Leswi switlhokovetselo swi lukiwile kahle hi ririmi ra nhlawulo wa le henhla. Sweswi swi le ka n’wina Vatsonga ku sirhelela no seketela ririmi ra Xitsonga hi ku tsala no hlaya tibuku ta Xitsonga.”****

With Flair Concepts Magazine.

…… To advertise on the Flair Online Magazine whatsapp / Call 083 317 1004 for a quote. Info@flairmagazine.co.za…..

 

 

Flair
the authorFlair

Leave a Reply